173. Schreiben König Ferdinands 1 an seinen Bruder Karl V.
PRAG, 14. März 1527. Abgedruckt in Gevay: Urkunden und Aktenstücke I.
Au surplus monsr pource que scay ce vous est plaisir entendre de mes bonnes nouuelles nay voulu laisser pour aucunement reconforter les autres et pour mon deuoir vous avertir comme le iour saint Mathias iour de vostre natiuite ie receuz la coronile de ce royaulme de Boheme. Et le landemain le semblable fit ma bonne compaigne le tout avec les solempnitez en tel cas accoustumes, et au grant contantement de tous ceulx du pays. En mont les barons seigneurs et subgectz faitz si triumphant et honnorable recueil auec bonne et unanime intencion et voulente me demourer bons et leaulx vassaulx et subgectz et comme telz employer leurs personnes et biens pour mon seruice. Dont de tout ien rens graces et louanges a dieu et luy supplie me donner la grace que ce puist estre a son saint seruice. Je me haste le plus quii mest possible pour vuyder les affaires de cedict pays, lesquelz sont si tresgrans et embroslez quii nest a croire de plus. Et graces a dieu ie y ay desia grandement exploitie et comme a souhaid et espere au plaisir de dieu de tresbonne yssue et de a mon partement laisser toutes choses en bon ordre pour incontinant apres tirer ez pays de Moravie et Sclesie pour les causes dessusdictes. Et ne scay pour le present chose autre dont ie saiche auertir vostredicte mate que ce que dessus, mais de ce qui surviendra feray tousiours deuoir le vous faire sauoir.
Monsr le conte palatin Fredrick ma presentement fait requerir vous escripre en sa faueur, a ce quii plaise a vostredicte Mate lauoir en la bonne et briefue depesche de ses affaires pour recommande. Et pource monsr que assez sauez le merite du personnaige, aiant mesmes regard aux seruices quii vous a par ci deuant faiz ne vous en veulx tenir long propoz. Fors pour luy satisfaire vous supplier treshumblement lauoir en sesdictz affaires et a la bonne et briefue expedicion diceulx pour singulierement recommande.